Gambar Ilustrasi
Siploeh yang rayeuk tanda kiamat, Nabi Muhammad na geu meusabda, oh katroeh watee kato kiamat, Geubri alamat siploeh boh tanda....
Tanda yang keu phoen Nabi hareuto, Rata jeut nanggroe kayem that geumpa,
Tanda keu dua meunan cit bago, rata jeut nanggroe jiek ie raya
Tanda yang keu lhee wahai dum kawoem, Keudee dum tutong dusoen ngoen kota,
Raa jeut nanggroe tadeungoe tutoeng, Kota ngoen gampong bandum seureuta
Tanda yang keupeut adun ngoen ado, Rata jeut nanggroe meuprang saudara, Kafe ngoen kaf hana reuda prang, Ureung Islam ppih sama saja.
Tanda keu limoeng wahai dum sahbat, Rata jeut simpang keudee meubanja, Kateudoeng keudee rata jeut simpang, Meukat makanan pupu yang hawa.
Tanda yang keunam wahai dum rakan, Dile gasin that jino kakaya, Jino ka kaya hareta leu that, Rumoeh meu tingkat jeundela kaca..
Tanda keu tujoeh hai bungoeng siroen, Dilee kaya that jino ka papa, Hareuta tanle blang deungoen lampoh, cit tinggai teuboeh hudep seugsara
Tanda keulapan geu kheun le Nabi, Ureung ek Haji rame lagoina, Ramee meleupah ureung ek haji, laoe peng suci ladoem ppng riba
Ladoem yang kaya bak cok tong judi, Meutamah lagi agen bak cina, Ladoem yang kaya bak agen candu, Na yang meukat bu buleun puasa, Asai ka kaya laju umeukah, Bateu dengoen sah hana jikira...
Tanda sikureung leumpah geotreugam, inong ngoen agam hana le beda, Inong soek leuweu agam panyang ok, ka sapue anggoek pikiran sama
Ta eu soek leuweu sang aneuk agam, Ta nging ok panyang sang anuk dara...
Tanda keu siploeh Nabi riwayat, Rakyat meu larat dusoen ngoen banda, Ureung yang meuat palak jih that-that, Kaji cok pajak meulipat ganda, Nibak masanyan han so pakoe, Peumimpin nanggroe ade tan lee na,
Rakyat ban kameng ikat lam uro, Peumimpin nanggroe buas buas ban sing, oh bacut salah rakya lam nanggroe, Boh bajoe beusoe jitroem jitampa
Nyoe han ta turoet lagee ji peugah, Keunoeng beureukah masoek peunjara, Bandum beuta turoet lagee ji peugah, Meunyoe tabantah di ilanya
Rakyat lam nanggroe dum teuhah babah, Lagee kameng grah dalam uroe kha, Banum beuta turoet lagee ji peugah, Nibak masanya han ek so pike, Ulama jahee masa nyan teuka
Ulama jahee lumpah tat kaplat, Hadis ngoen ayat di tuka tuka, Ulama jahee lumpah tat dengki, sabee di caci alam oukaha, Bak hadis za'if sinan di meudoeng, Laen mandum koen han di peucaya
Aneuk peusanten di peugah salah, Eatei khutbah di thok thok dada, Di peugah hukooem yang salah-salah, Di mita meugah bak ureung donya...
Oh no keuh mantoeng tanda yang siploeh, Aleh cit ka troeh ci neu paunyata,......
yang krang Nazam TGK. CHIK TANOH ABEE, bak thoen siribe lapan ploh dua.
No comments:
Post a Comment